2020an, Ekitermik enpresak energia-auditoria bat egin zuen Urretxuko kiroldegian, eraikinaren energia-eskaria eta zituen instalazioak ezagutzeko.

Auditoria horren ondorio gisa, hainbat hobekuntza proposatu ziren instalazioetan, energia-eraginkortasuna hobetzeko helburuarekin.

Ekitermik enpresak uda honetan amaitu du berrikuntza.

Ur bero sanitarioaren ekoizpen-galdaren gela berritzea

Dagoen gasolio-galdararen ordez, eraginkortasun handiko gas naturaleko kondentsazio-galdara bat jarri du.

Biltegia eta hodiak berritu dira, isolamendua areagotuz, bero-galerak saihesteko. Kontrol-koadro berri bat instalatu du, instalazio zaharraren eraginkortasunik eza saihesteko.

Kantxako eta harmailetako berokuntza, hodi erradiatzaileen bidez

Kiroldegiak gasolio-beroaren sorgailu bat zuen, kantxa eta harmailak berotzeko. Kantxaren altuera kontuan hartuta, beroa goialdean kontzentratzen zen, eta denbora luzea behar izaten zen erosotasun-tenperatura lortzeko, horrek dakarren xahutze energetiko eta ekonomikoarekin.

Soluzio gisa, gas naturaleko hodi erradiatzaileak instalatu dira. Horrela, alde batetik, beroa erabiltzen ari den eremura bideratzea eta fokalizatzea lortzen da. Bestalde, beroa sektorizatzea lortzen da, erabiltzen ari den eremuaren arabera, kantxako edo harmailetako edozein gunetan.

Gimnasioa bero-ponpen bidez girotzea

Gimnasioak gasolio-beroaren sorgailu bat zuen, eta ez zegoen aretoa girotzeko aukerarik.

Soluzio gisa, sorgailuaren ordez bero-ponpak jarri dira, eta ponpa horiek gunea berotzeko edo girotzeko aukera dute, unean uneko beharraren arabera.

Bero-ponpen bidez, eraginkortasun energetiko handiagoa lortzen da.

Horrez gain, iragazki erantsiak dituen haizagailu bat instalatu da gimnasioko airea berritzeko.