Universitat Oberta de Catalunyak (UOCk), Mondragon Unibertsitateak eta OpenEU eta EU4Dual Europako unibertsitate-aliantzek T-LED (Testing Labour-Oriented European Degrees) sustatuko dute, zortzi baterako titulu garatzeko eta orain gutxi onartutako Joint European Degree Labelen irizpideetara egokitzeko proiektua. Europako hainbat unibertsitatek batera diseinatutako eta emandako titulu ofizialak nabarmendu nahi dira zigilu horren bidez. Proposamenak Europako Batzordearen ebaluazio positiboa jaso du, Erasmus+ European Degree Exploratory Action deialdian. Baterako tituluetarako Europako etorkizuneko zigilua probatzea eta garatzea helburu duten Europako 14 ekimenetako bat da proiektua, Goi-mailako Hezkuntzaren Europako Esparru integratuago baterantz egiteko Europako Batzordeak duen lehentasun estrategikoetako bat.

Hiru urteko iraupena aurreikusten zaio T-LEDi. Aukera emango du Europako zigiluaren irizpideak probatzeko, onlineko programetan, programa dualetan, hibridoetan eta lan-inguruneari lotutakoetan. Proiektuak Europako hamalau herrialdetako instituzio eta erakundeak biltzen ditu. Finantzaketatik harago, European Degree etorkizuneko zigilua Europan ezartzea erraztuko duten irizpideak, tresnak eta prozesuak probatuko ditu UOCk, proiektuari esker.

Proiektuak uztartu egingo ditu, batetik, UOCk koordinatutako OpenEUren esperientzia —hezkuntza irekian, digitalean eta urrunekoan duena— eta, bestetik, Mondragon Unibertsitatea buru duen EU4Dualek prestakuntza dualean eta enpresekiko lankidetzan duen espezializazioa. Bi aliantza horien arteko lankidetzari esker, bi unibertsitate-eredu osagarri integratu ahal izango dira, Europan titulu malguagoak, inklusiboagoak eta premia sozialei eta lan-merkatuari estuki lotutakoak diseinatzeko.

Partaide izango dira, halaber, erakunde elkartu gisa, AQU Catalunya eta Unibasq —Kataluniako eta Euskal Herriko unibertsitate-kalitatearen agentziak— eta UNED.

«Proiektu berri horren bidez, Europak aintzatetsi egin ditu, berriro, bizialdi osoko ikaskuntzara bideratutako hezkuntza-modalitateek eskaintzen dituzten aukerak. UOCk OpenEU aliantzako gure kideekin lankidetzan urteetan egindako lanean oinarritzen da aintzatespen hori», azaldu du Pastora Martínez Samperrek, UOCren nazioarteko ekintzarako ordezkariak.

«Ekimen horrek aukera ematen die gure erakundeei, enpresak eta erakundeak unibertsitate-tituluen diseinuan eta garapenean inplikatzeak duen garrantzia nabarmentzeko, eta lankidetza-eredu hori Europan aintzatesteko urratsak egitearen inportantzia bistaratzeko», esan du Jon Altunak, Mondragon Unibertsitateko errektoreorde akademikoak eta EU4Dual aliantzaren koordinatzaileak.

Ekimenak lehendik dauden lau baterako titulu egokituko ditu, eta gradu-, master- eta doktorego-mailetako beste lau hutsetik diseinatuko. Programek Europarentzat funtsezkoak diren arloetan jarriko dute arreta, hala nola softwarearen garapenean, industriaren eraldaketan, jasangarritasunean, osasunean, arriskuen kudeaketan eta digitalizazioan.

Mugikortasun malgua eta enplegagarritasuna

Hain zuzen ere, nazioz haraindiko mugikortasunari dagokionez, erronketako bat da egiaztatzea zigilu horren irizpideak nola aplika daitezkeen lan egiten duten bitartean ikasten duten, malgutasun handiagoa behar duten edo beste herrialde batzuetan egonaldi luzeak egin ezin dituzten pertsonentzat pentsatutako hezkuntza-ereduetan. Bizialdi osoko ikaskuntza Europako agendan gero eta garrantzi handiagoa hartzen ari delarik, proiektuak helburu hauek ditu: lan-merkatuarekin lotura handiagoa duen eredu malgu eta inklusiboago hau sustatzea, eta nazioarteko mugikortasuna ikasleen erantzukizun profesional eta pertsonalekin bateragarri egiten laguntzea.

Proiektuaren beste asmoetako bat da tituluen diseinuan enpresen eta beste eragile sozial batzuen parte-hartzea indartzea. Proposamen dualek prestakuntza akademikoa eta enpresetan ikasteko egituratutako aldiak konbinatuko dituzte; onlineko programek, berriz, nazioarteko proiektuak, enplegatzaileekiko lankidetza eta hainbat herrialdetako taldeek garatutako esperientziak jasoko dituzte.

Laguntza handiagoa askotariko profilentzat

Joint Bachelor’s Degree (OpenEUren lehen baterako gradua) Europako zigiluaren irizpideetara egokitzeko zereginean hartuko du parte UOCk, eta ikasleei laguntzeko lan-blokea gidatuko du. Haren zeregina izango da neurriak koordinatzea, baterako programetan askotariko profilek parte hartzea errazteko, bereziki ikasketak lanarekin, zaintzarekin edo beste erantzukizun batzuekin uztartzen dituzten pertsonek.

Gainera, parte hartzen duten erakundeen artean datu akademikoak segurtasunez trukatzea bultzatuko du unibertsitateak, eta gradudunen jarraipena egiteko Europako protokolo bat koordinatuko. Helburua izango da haien bilakaera profesionala hobeto ezagutzea, tituluen eta lan-merkatuaren arteko lotura ebaluatzea eta lortutako emaitzetatik abiatuta programetan hobekuntzak sartzea.

Esparru estrategikoetako zortzi titulu

Hauek dira Europako zigiluaren irizpideetara egokituko diren lau tituluak: Software Garapeneko eta Probetako Gradua, Enpresa Arriskuen Kudeaketako Masterra, Fabrikazio Digital eta Jasangarriaren Ingeniaritzako Masterra, eta Ekonomia Berdeko eta Etorkizun Jasangarriko MBA.

Software Garapeneko eta Probetako Gradua, UOCk koordinatua Herbehereetako Open Universiteitekin eta UNEDekin batera, online soilik emango da, eta 180 ECTS kreditu izango ditu. Lehenengo edizioa 2026-2027 ikasturterako aurreikusita dago, eta softwarearen bizi-ziklo osoan esku hartzeko gai izango diren profesionalak prestatuko ditu, diseinutik eta garapenetik hasi eta probetaraino, mantentze-lanetaraino eta kalitate-bermatzeetaraino.

Open University of Cyprus unibertsitateak koordinatutako Enpresa Arriskuen Kudeaketako Masterra abian da, eta Europako irizpide berrietara egokituko da. Bestalde, Mondragon Unibertsitateak koordinatzen duen Fabrikazio Digital eta Jasangarriaren Ingeniaritzako Masterrak 2026ko udazkenean jasoko du bere lehen promozioa, eta Ekonomia Berdeko eta Etorkizun Jasangarriko MBA, Savonia University of Applied Sciencesek koordinatua, 2027ko urtarrilean hasiko da.

Sortu berri diren lau tituluak hauek izango dira: Larrialdi Klimatikoko eta Jasangarritasuneko Masterra, Bizitza Osasungarriko eta Osasun Integratuko Masterra, Industria Digitalerako Proiektuen Kudeaketako Masterra eta diziplina anitzeko industria-doktoregoko programa.

Klima Larrialdiko eta Jasangarritasuneko Masterrak aurreikusten du 2026-2027ko neguan programa pilotu bat abiaraztea eta 2028an guztiz zabaltzea. Bizitza Osasungarriko eta Osasun Integratuko Masterra 2027ko udazkenean abiatzea dago aurreikusita, eta Industria Digitalerako Proiektuen Kudeaketako Masterra, berriz, 2028ko udazkenean.

Industria-doktoregoak, onlineko ikerketa-prestakuntza eta enpresekin lankidetzan garatuko diren proiektuak uztartuko dituenak, proiektu pilotua 2027-2028ko neguan abiaraztea du aurreikusia, eta 2028-2029 ikasturtean ezartzea. Tesi bakoitzak gainbegiratze akademiko eta profesionala izango du, ezagutzaren transferentzia errazteko eta ezagutza hori industriaren eta gizartearen benetako erronketan aplikatzeko.

Unibertsitate-aliantzetatik partekatutako tituluetara

T-LEDek hezkuntza-eredu desberdinak dituzten bi unibertsitate-aliantzen arteko lankidetza eta ikaskuntza indartzen ditu. OpenEUk unibertsitate ireki eta urrutikoak hartzen ditu barne, eta goi-mailako hezkuntzarako sarbidea zabaltzea eta etengabeko ikaskuntza sustatzea du xede. EU4Dual, bestalde, hezkuntza dualean dago espezializatuta, prestakuntza akademikoa eta lan-esperientziak nahasten dituen ereduan.

Bi aliantzen arteko lankidetzari esker, enpleguarekin lotura handiagoa duten titulu malgu eta inklusiboagoak diseinatuko dira Europan, bai dedikazio osoko ikasleei, bai lanean ari direnei laguntzeko. Proiektu horrekin, UOCk indartu egin du bere eginkizuna, Goi-mailako Hezkuntzaren Europako Esparruaren orainaldia zehazten laguntzen ari den Europako unibertsitateetako bat den aldetik, eta sendotu goi-mailako hezkuntza-eredu ireki, digital eta internazionalak garatzeko duen lidergoa.