XXI. mendeko erronka globalei erantzun komunitario propioa emango dien eraldaketa mugimendu bat sustatzeko egitasmoa da Debagoiena 2030. Askotariko eragile eta norbanakoen lankidetzatik, metodologia, proiektu eta ekimen ezberdinak bultzatu eta konektatuz, erronka horietan inpaktu esanguratsua izan nahi duen sarea sortzen ari da.

Sare horretan, eskualdeko udal batzuk, esaterako, Arrasate, Oñati eta Bergarako udalek, mankomunitateak, Gipuzkoako Foru Aldundiak, eta eragile ekonomiko eta komunitario batzuk parte hartzen dute, tartean PT Garaia.

D2030 ekimenak irailean jarriko du martxan eskualdeko eraldaketa bultzatze bidean sortutako proiektu sorta, uztailaren 22an ekimeneko gobernu gorena den Gobernu batzordeak proposamena onartu ostean.

Proiektuak askotarikoak dira. Debagoiena adimentsu, inklusibo eta klimatikoki neutro baterantz bideratuak; lanaren etorkizunarekin, inklusio sozialarekin, hezkuntzarekin, energiarekin, elikadura sistemekin, ekonomia zirkularrarekin eta komunitatearen parte-hartzearekin eta ahalduntzearekin lotutakoak. Hain justu ere, aniztasun horrek, gizarteko eremu desberdinetan eragiteko gaitasuna emango dio proiektuari.