Datorren otsailaren 23an, 15:30etik aurrera, industria alorreko startup-en inbertsio-foroaren bigarren edizioa egingo da, Keiretsu Forum-ek, Business Angels inbertitzaile pribatuen nazioarteko sarerik handiena, eta MONDRAGON Korporazioko Sustapen Zentro korporatiboak, ekintzailetza, dibertsifikazioa eta enpresa-jarduera berriak sortzea xede duena, elkarlanean antolatuta. Foro hau FORMATU PRESENTZIALEAN SOILIK egingo da, Garaia Parke Teknologikoan (Arrasate).

Berrikuntza irekian eta Industry 4.0 eremuan aktiboak diren enpresa industrialek eta arlo horietan espezializatuta dauden arrisku-kapitaleko erakundeek osatutako mahai-inguruak emango dio hasiera foroari. Bertan, inbertsio industrialean eta dibertsifikazioan duten ezagutza, esperientziak, aukerak, zailtasunak etab. izango dituzte hizpide. Ondoren, inbertsio-foroa egingo da, industria alorreko edota industriari eta haren prozesuei aplika dakiekeen produktu/teknologia duten startup-ak aurkeztuz. Enpresen hautaketa Keiretsu Forum-ek eta MONDRAGON Sustapen Zentroko taldeak aurretiaz egingo dute.