IKERLAN eta Secure ML elkarlanean ari dira adimen artifizial seguruagoa eta fidagarriagoa bultzatzeko

RK Jatetxeak zapore gastronomikoa eman dio BNI Aukera Debagoienako topaketari
16 October, 2026
Enterprise Eurolodging
20 October, 2026
RK Jatetxeak zapore gastronomikoa eman dio BNI Aukera Debagoienako topaketari
16 October, 2026
Enterprise Eurolodging
20 October, 2026

IKERLAN eta Secure ML elkarlanean ari dira adimen artifizial seguruagoa eta fidagarriagoa bultzatzeko

Lankidetzaren helburua da enpresei adimen artifizialeko sistemak babesteko gaitasun aurreratuak eskaintzea, sektore kritikoetan gero eta presentzia handiagoa duten teknologien segurtasuna, pribatutasuna eta fidagarritasuna indartuz.

Adimen artifiziala enpresek produktuak diseinatzeko, prozesuak optimizatzeko eta erabakiak hartzeko modua eraldatzen ari da. Hala ere, teknologia horien erabilera azkar hedatzeak arrisku berriak ere sortzen ditu zibersegurtasunarekin, pribatutasunarekin eta sistema adimendunen osotasunarekin lotuta. Erronka horri erantzuteko, IKERLANek eta SecureMLk elkar ulertzeko memorandum bat (MoU) sinatu dute, adimen artifizialaren segurtasunaren eta pribatutasunaren arloan lankidetzarako aukerak aztertzeko.

Akordioak jarraipena ematen dio IKERLANen eta Stjepan Piceken artean urteetan zehar garatutako harremanari. Picek SecureMLren sortzailea da, eta nazioarteko erreferentea adimen artifizialari aplikatutako segurtasunaren ikerketan.

Lankidetza horren bidez, bi erakundeek teknologia aurreratuak merkatura transferitzeko prozesua bizkortu nahi dute, adimen artifizialeko sistema sendoagoak, seguruagoak eta fidagarriagoak garatu eta erabiltzea ahalbidetzeko.

Gero eta handiagoa den erronka bati erantzutea

Adimen artifiziala sektore ekonomiko guztietan hedatzeak enpresen eta erakundeen mehatxu berriekiko esposizioa areagotzen du. IA produktuetan, zerbitzuetan eta azpiegitura kritikoetan txertatzen den heinean, ezinbestekoa da sistema horiek erasoen aurrean duten erresistentzia, informazioaren babesa eta funtzionamenduaren fidagarritasuna indartzea, bizi-ziklo osoan zehar.

Testuinguru horretan, IKERLANek eta SecureMLk ezagutza eta gaitasunak partekatuko dituzte datozen urteetako erronka teknologiko handienetako bati aurre egiteko: adimen artifizialean oinarritutako sistemak ahultasunen, manipulazioen eta erabilera desegokien aurrean babestea.

“Adimen artifiziala indar handiz ari da sartzen produktuetan, prozesuetan eta azpiegitura kritikoetan, eta haren segurtasunak erritmo berean egin behar du aurrera. SecureMLrekin dugun lankidetza honi esker, gure gaitasunak indartu ahal izango ditugu funtsezkoa izango den arlo batean, enpresek IA konfiantzaz har dezaten eta haren potentzial guztia modu seguru eta arduratsuan aprobetxa dezaten”, adierazi du David Gonzálezek, IKERLANeko zibersegurtasun eta fidagarritasun arloko arduradunak.

Lankidetza bi esparru nagusitan oinarrituko da. Alde batetik, datuak aztertzeko edo aurreikuspenak egiteko erabiltzen diren adimen artifizialeko sistemen babesean. Sistema horien segurtasuna bizi-ziklo osoan landuko da, datuen kudeaketatik eta ereduen entrenamendutik hasi eta martxan jartzera, erabilerara eta eguneraketetara arte, informazioa eta ereduak erasoen edo manipulazioen aurrean babesteko.

Bestetik, adimen artifizial sortzailearen eta zereginak egiteko gai diren agente adimendunen segurtasuna landuko da. Tresna horiek ebaluatuko dira, baita erantzunak sortzeko dokumentuak eta bestelako informazio-iturriak kontsultatzen dituztenak ere, hainbat arriskuren aurrean duten segurtasuna aztertzeko: jarraibide maltzurren bidezko manipulazioa, informazio-ihesak edo baimenik gabeko ekintzak egitea, besteak beste.

Gaitasunak uztartzea enpresa-eremuan eragina sortzeko

Lankidetzak elkarren osagarri diren gaitasunak uztartzen ditu. SecureMLk adimen artifizialaren segurtasunean duen ezagutza espezializatua eskaintzen du, baita mota horretako irtenbide aurreratuak eskatzen dituzten erakunde handiekin duen harreman-sare zabala ere. IKERLANek, berriz, ikerketa aplikatuan, garapen teknologikoan eta segurtasunaren zein zibersegurtasunaren arloetako ezagutza enpresa-sarera transferitzen duen esperientzia eskaintzen du.

Gaitasun osagarri horiei esker, bi erakundeek garapen teknologiko berriak bultzatu, ekimen bateratuetan parte hartu eta segurtasunaren eta konfiantza digitalaren ikuspegitik bereziki zorrotzak diren sektoreetan jarduten duten erakundeei irtenbideak eskaini nahi dizkiete.

Pribatutasunaren laburpena

Webgune honek cookieak erabiltzen ditu ahalik eta erabiltzaile-esperientziarik onena eskaini ahal izateko. Cookieei buruzko informazioa zure nabigatzailean gordetzen da, eta gure webgunera itzultzen zarenean zeure burua ezagutzeko edo gure ekipoari webguneko zein atal aurkitzen dituzun interesgarrienak eta erabilgarrienak ulertzen laguntzeko funtzioak betetzen ditu.

Gure cookie politikari buruzko informazio gehiago.