Datorren azaroan, Arrasateko GARAIA Parke Teknologikoak «Drone Soccer Euskadi Txapelketa» ekimenaren lehen edizioa hartuko du. Euskadin aitzindaria den ekitaldi hau 2026ko Zientzia eta Teknologia Astearen barruan egingo da.

Lehiaketak Euskadi osoko ikastetxeetako 100 talde inguru eta 300 ikasle gazte baino gehiago bilduko ditu, droneak, kirola eta STEAM hezkuntza uztartzen dituen diziplina baten inguruan. Drone Soccer gorabidean dagoen kirol teknologikoa da, eta dagoeneko liga aktiboak ditu 30 herrialde baino gehiagotan, besteak beste, Asiako hainbat herrialdetan, Estatu Batuetan, Frantzian, Erresuma Batuan eta Alemanian. Gainera, pixkanaka ikastetxeetako, Lanbide Heziketako eta unibertsitateetako hezkuntza-programetan txertatzen ari da, STEAM ikaskuntzarako tresna gisa.

Lehiaketaren formatua

Txapelketa azaroko bost jardunalditan egingo da. Lehenengo lauak sailkapen-jardunaldiak izango dira, eta bakoitzean gehienez 24 talde lehiatuko dira, multzoen fasean. Jardunaldi bakoitzeko lau talde sailkatuko dira azaroaren 13an jokatuko den final handirako.

Talde bakoitza 12 eta 16 urte bitarteko hiru pilotuk osatuko dute. Lehiaketak epaile ziurtatuak eta puntuazio-sistema digital ofizial homologatua izango ditu.

Lehiaketa bat baino gehiago

Kirol-lehiaketaz harago, ekitaldiak berrikuntzaren eta droneen teknologiaren inguruko ekosistema oso bat sortzea du helburu. Programak droneen aplikazio profesionalei eta 4.0 industriari buruzko hitzaldiak eta tailerrak eskainiko ditu. Halaber, enpresa-erakustaldi bat egingo da, eta bertan sektore teknologikoko euskal startupek eta enpresek beren azken proiektuak eta lurraldeko talentu gaztearekin lankidetzan aritzeko aukerak aurkeztuko dituzte.

Parte hartu nahi duten ikastetxeek izena emateko formularioa bete beharko dute, ikastetxearen, taldeen eta jokalarien datuak adierazita. Jardunaldi bakoitzean gehienez 24 talderentzako lekua egongo da, eta plazak izen-ematearen hurrenkeraren arabera esleituko dira.

Flybblek eta PTGaraiak elkarlanean antolatutako ekitaldi honek indartu egiten du parke teknologikoak berrikuntzari, teknologiari eta talentu gazteari lotutako lankidetza-ekimenak sustatzeko duen konpromisoa.

Informazio gehiago: komunikazioa@ptgaraia.eus

OHARRA: Parte hartzeko ez da beharrezkoa aldez aurretik esperientzia izatea, ezta inolako materialik ekartzea ere. Beharrezko ekipamendu eta baliabide guztiak PTGaraia-n egongo dira eskuragarri.