Garaia Parke Teknologikoan kokatuta dagoen COMPO GLOBAL SOLUTIONS enpresak, urriaren 28an, Europako Enpresentzako Ingurumen Sarietan finalista izan zen. Hori dela eta, bertako komertzial teknikaria den Ariane Inzarekin egon gara:
Urriaren 28an, Europako Enpresentzako Ingurumen Sarietan irabazle izan zarete. Nola jaso zenuten albistea?
Accesit batekin saritu gaituzte estatu mailan eta oso
pozik gaude, gure lanaren aitorpen bat bait da. Telefonoz abisatu zidaten
Trantsizio Ekologiko eta Erronka Demografikorako Ministeriotik, zehazki
Biodibertsitatea Fundaziotik, eta sorpresa handia izan zen. Prozesu guztia
atzeratu egin zen pandemiarengatik eta ia ahaztuta geneukan. Gainera, enpresa
oso indartsuak aurkezten dira sari hauetara eta ez genuen esperantza gehiegi.
Euskadiko sarietan ere irabazle izan zarete?
Bai,
Euskadiko atalean ere irabazle suertatu gara. Honekin beranduago enteratu
ginen, gehiago atzeratu bait zen hautapen-prozesua. Nola ez, poz haundiz hartu
genuen albistea.
Zertan datza Europako Enpresentzako Ingurumen Sariak?
Sari hauek Europako enpresak (handi, ertain, txiki zein mikro)
euren negozioen bideragarritasun ekonomikoa, ingurumenaren babesarekin
arrakastaz uztartzen dutela aitortu eta saritzeko dira. Kategoria desberdinak
daude:
- Kudeaketa
- Produktua
eta/edo zerbitzua
- Prozesua
- Nazioarteko
enpresa-lankidetza
- Enpresa eta
biodibertsitatea
Enpresa bakoitza kategoria batera baino gehiagotara
aurkeztu daiteke eta hiru atal daude, erkidegokoa, estatukoa eta Europakoa.
Hautagaitza aurkeztean erkidego eta estatu mailan hartzen da parte. Europara
pasatzeko berriz, estatu mailan hautatu behar zaituzte. Bertara enpresa handiak
bakarrik iristen dira.
Gu Saiolan-en bidez enteratu ginen aurreko urtean,
Ihobeko mezu bat jaso bait zuten inguruko enpresei sari hauetara aurkezteko
animatzeko eskatuz.
Egia esan ez genekien zer espero, lehenengo aldia bait
zen aurkezten ginela. Dokumentuak prestatzea ez zen lan gehiegi izan eta sari
bezala publizitate pixka bat jasotzea ongi etorria izango zela pentsatu genuen,
beraz, aurkeztu egin ginen eta ez genuen berriz horretan ia pentsatu ere egin,
deia jaso nuen arte.
Ze kategoriatan izan zarete sarituak? Zer baloratzen dute epaileek kategoria horretan?
Prozesua kategoriara aurkeztu ginen. Bertan,
produkzio-prozesu eta metodoetan aplikatuko den teknologia berri baten garapena
edo/eta inplementazioa saritzen da, garapen jasangarrirako lagungarria dena. Teknologiak
ingurumenerako ekarpen positibo bat izan behar du, eta, aldi berean, onura
sozial eta ekonomikoak ekarri.
Zer da zuentzako horrelako sari bat irabaztea?
Mikro-enpresa bat izanda, alde batetik, ilusioa ematen du
horrelako sari bat jasotzeak eta aurrera jarraitzeko bultzakada txiki bat ere
bada. Azken finean, aditu talde batek 115 hautagaitza aztertu ditu eta horietatik
25 hautatu dituzte, tartean gurea.
Bestalde, publizitatea egiten digu eta hori beti dator
ongi.